Saturday 15 September 2007

شبـــــــاب الخـيـــــــــــر


محدث


شـبـــــــــــاب الخـيـــــــــر
one Vision ... one Hand ... one Heart





شباب اجتمعوا على حب الله والرسوله وفعل الخير .... شباب اجتمعوا في حلم واحد وهو اسعاد الفقراء ومساعده المحتاجين
اسعدني اني كنت واحد منهم ...
بدأت فكره شباب الخير السنه اللي فاتت ... وقامو بأفعال خير كتيييييره جميله
لما شاركت معاهم لاقيت فيهم حب غير عادي لفعل الخير ...وروح جميله اوي بينهم ... وحب كبيييييييير اوي في المشاركه
حسيت اني لازم اكمل معاهم واشاركهم في كل اللي بيعملوه .... وشاركتهم بالفعل وقمت معاهم بأفعال جميييييييله اوي مش قادر اوصفها
بس هحكي عنها ..
لما شاركت مع الجروب ده كانوا بالفعل قاموا بأول افكارهم وهيا فكره شنطه رمضان وعرفت انهم جمعوا مبالغ كبييييييييييييره وعملوا اكبر عدد من شنط رمضان اللي كان فيها كل اللي يحتاجه اي حد ما كانش قادر يشتريه





اشتركت معاهم في الفكره التانيه .... وكانت توزيع ملابس العيد
شاركتهم وهما بيوزعوا ملابس العيد على الفقراء يمكن شاركت بمجهود بسيييييييييط جدا لايذكر بس كنت مبسوط جداااا وكنت مبسوط جدا بروح المشاركه بين الشباب دول وحبهم للخير وعجبتني اوي الفكره وكنت متضايق اني مش عارف اشارك ازاي لكن لما عرفت ان لسه فيه افكار كتير بعد كده وانهم هيزوروا دور للايتام ويشاركوا الاطفال العيد فرحت اوي وقررت اشارك وابذل اقصى مجهودي واقصى ما عندي وفعلا شاركت يمكن مشاركه بسيطه بردو بس كنت فرحان جدا لاني حسيت اننا بنعمل حاجه من قلبنا بجد من غير انتظار او التفكير في اي مقابل غير الثواب واننا كلنا بنساعد بعض وبنشارك بعض عشان نقدر نسعد الاطفال دول.
انا عن نفسي كنت اول مره اعمل حاجه زي كده ومافكرتش قبل كده اني اروح دار ايتام واشارك والعب مع الاطفال وكده وبجد كانت حاجه جديده عليا وجميله اوي ومفيده كتيييييييييييير واشكر شباب الخير انهم كانوا سبب في اني اعمل حاجه زي كده










وشوفنا الاطفال ولعبنا معاهم وضحكنا معاهم وفرحناهم كنت فرحان اوي لان الاطفال دول مش فرحانين عشان العيد او اللعب لان هما مش مدركين بالدنيا حواليهم لانهم كانوا ذوي احتياجات خاصه.. هما بس فرحانين عشان لاقوا حد يلعبوا معاه ويضحكوا معاه وكانوا فرحانين اوي بجد وكانت الفرحه ف عنيهم فرحه حقيقيه وكبيره جدااااا ومثل لولد من الاولاد دول: ولد كان كل سعادته ف انه ياخد البلونه يفرقعها ..مافكرش ف ان دي لعبه ممكن يستغلها لاطول فتره ممكنه عشان يفضل فرحان بيها اطول فتره ممكنه انما هو كان بيعمل كده لما كنت بديله البلونه ويفرقعها كان بيعمل كده وبيقى فرحان اوي عشان هو بيلعب معايا وبيضحك معايا مش عشان دي لعبه هيلعب بيها وكنت فعلا بشوفه وهو بيضحك بلاقى الفرحه ف عنيه كبيره اوي وكنت فرحان عشانه جدا.....
دي كانت احلى حاجه عملتها مع الجروب ده ..... وكان عندنا افكار كتييييييييييييييييييره عاوزين ننفذها بس للاصف منعتنا ظروف كتيييير منها الامتحانات ومنها اللي كان سافر ومنها اللي كان مشغول بظروف خاصه بيه
المهم ان الشباب دول بدأو يتجمعوا من تاني السنه دي وحلمنا نحقق اللي حققناه السنه اللي فاتت ونعمل حاجات كتييييييير في رمضان ده
ونكرر فكره شنطه رمضان .... ربنا يوفقنا في اننا نعملها ...بس طبعا عاوزين مساعدتكوا معانا عشان نقدر نحققها
ونكمل باقي افكارنا
وبدعى ربنا ان شباب الخير يستمروا دايما ياااااااارب لان هما شباب كلهم اجتمعوا على حب الخير وحب الله وحب المشاركه وبشكر ربنا اللي جمعني بيهم وبشكر جدا كيموا اللي كان سبب ف معرفتي بيهم ومشاركتي ليهم
واتمنى انكوا تساعدونا في تحقيق افكارنا دي اللي مش عاوزين منها اي مقابل ...غير اننا بنعمل خير فعلا وبس

Tuesday 3 July 2007

تاج اختبار الشخصيه

وادي كمان تاج وصلني من صاصا صاحب مدونه حكايات زمان اجمد مدونه بتتكلم عن التاريخ
بس التاج ده المره دي مختلف عن التاج الاول
ده بقى عباره عن 3 اختبارات للشخصيه

تعالوا نشوف نتيجه الاختبارات دي

دي كانت نتيجه اول اختبار

وكان عباره عن اني اشبه اي من القاده

وكانت نتيجته اني اشبه




غااااااااااااندي




وطبعا كلنا نعرف الزعيم الهندي غاندي


اما الاختبار التاني بقى

كان عباره عن انت شبه اي الافلام الكلاسيكيه

وكان فيلم





اما الاختبار الثالث
كان عباره عن
انت شبه مين من ابطال مسلسل friends
وطلعت شبه



Which Friend Are You Quiz on tbs.com

و كانت النتيجه اني اشبه

Chandler

احب بقى امرر التاج ده ل

stoophere

رنين الصمت

الاختبار الاول

http://similarminds.com/leader.html

الاختبار الثاني

http://similarminds.com/movie.html

الاختبار الثالث

http://www.tbs.com/exclude/popuphandler/0,,6500,00.html

Wednesday 20 June 2007

عقبالكوا



متوقف عن الكتابه نظرا للسفر لاداء العمره

عقبالكوووووووووووووووووووووووووو

Saturday 9 June 2007

روتيـــن بلــــدنـــا

لما عرفت اني هسافر السعوديه وهعمل عمره وطلب مني والدي اني ابدأ في تحضير الباسبور واوراقي طبعا فرحت جدا وكنت متخيل ان الاوراق دي تقريبا مش هتاخد اكتر من اسبوع ... وكان الكلام ده تقريبا في منتصف شهر فبراير الماضي ... والمفروض ان العمره في اخر شهر مارس ... ده كان المفروض بقى ...
كان اول حاجه لازم اعملها اني اطلع باسبور ... وعشان اطلع باسبور كان لازم اجيب شهاده خدمه عسكريه من القسم اللي انا تابع ليه ..وبعد ما جبت الشهاده دي روحت لمكتب بريد عشان اجيب استماره 6 جند ودمغات وبعد ما جبت الاستماره والدمغات روحت لشئون طلبه كليه التجاره عشان اجيب عن طريقهم تأجيل الجيش لحين انتهاء فتره دراستي بالكليه...
.
وهنا كان اول مظاهر الروتين ... لما قدمت الاستماره لشئون الطلبه اخدها مني الموظف المختص وقالي تعالى بكره اسأل عليه (فوت علينا بكره يا سيد) شعار الموظف المصري... ولما قولتله اني مستعجل جدا ومحتاجه في اسرع وقت ممكن ...قالي اني هقوم بالاجراءات بنفسي طالما مستعجل ..وافقت طبعا وسألته على الخطوه اللي بعد كده قالي اني المفروض اروح اختم الاستماره دي من موظفين العسكريه اللي في شئون الطلاب .. وبالفعل روحت وختمتها من الموظف وقالي الموظف اجي بعد اسبوع اسأل عليه...قولتله اكمل انا الاجراءات بنفسي لاني مستعجل ف رفض (يعني الخطوه دي اللي عملتها دي كانت هتاخد يوم لو ما كنتش انا عملتها بنفسي ..على الرغم من ان مكتب موظف شئون الطلاب جنب مكتب موظف العسكريه)
.
...وبعد اسبوع روحت للموظف ولما سألته على الاستماره والتأجيل ... قالي ان التأجيل لسه ما جاش وارجع اسأل عليه بعد اسبوع كمان واستمر الحال ده لمده شهر واسبوع تقريبا....
وبالتالي اتأجلت العمره للمره الاولى لاخر شهر ابريل....
.
وبعد مرور شهر واسبوع ....اخيراااااااا ...وبعد اكثر من مره اروح لشئون الطلبه اسأل على التجنيد وبعد مشادات كثيره مع الموظفين وصل التأجيل وطلبوا مني اني اروح اجيب الورق من المدينه الجامعيه...ودخلت المدينه الجامعيه و فضلت ادور على المكتب اللي هجيب منه الورق وبعد ما وصلت وجبت الورق ورجعت تاني لموظف الشئون العسكريه قالي تعالى بكره ولما دخلت في مشاده جديده معاه وقولتله اني مستعجل اداني الورق وقالي اروح لشئون الطلبه (بردو كان الخطوه دي هتاخد يوم لو ما كنتش اتخانقت معاهم) ولما روحت لشئون الطلبه كان اليوم ده خاص بالبنات ...لكن ما كانش في ولا بنت ليها طلب في شئون الطلبه في اليوم ده ...فلما روحت عشان اخد اثبات القيد قالتلي الموظفه تعالى بكره لان ده يوم البنات ف مش هناخد منك حاجه ... ولما اتخانقت معاهم كالعاده قالتلي انتوا ليه بتزعلوا من النظام (نظام ده ولا روتين يا عاااااااااالم) ولما قولتلها ده روتين واني مش هسيب الروتين يعطلني زعقت وهددتني انها هتجيب حرس الجامعه ولما فضلت مصمم وفضلت ازعق واحده من الموظفات قالتلها خدي منه الورق وخلاص بقى (طب ما كان م الاول يا نااااااااااس) ولما اديتها الورق قالتلي تعالى بكره عشان لسه اثبات القيد هيتختم ولما صممت اني اخده حالا طبعا انتوا عارفين الباقي (طب خده وروح بنفسك اختمه) ... وبكده خلصت الخطوه دي
.
اتجهت بعد كده لاداره الجوازات عشان اعمل الباسبور ولاول مره يخلص اجراء في نفس اليوم والحمد لله اخدت الباسبور بعد كام ساعه طبعا....
.
بعد كده كان تاني خطوه المفروض هيا الحصول على التأشيره واللي كانت المفروض بتاخد اسبوع ...لكن لظروف خاصه بالسفاره السعوديه التأشيره اتأخرت واخدت اكثر من شهر...
وبكده العمره اتأجلت من اخر ابريل لاخر مايو... لكن لاني كان عندي امتحان في مايو اتأجلت لاخر يونيو...
وكده افتكرت اني خلاص خلصت اجراءتي واني المفروض انتظر لحد معاد السفر وخلاص هسافر...
لكن فوجئت بأني المفروض اجيب تصريح سفر من التجنيد عشان اقدر اسافر
وعشان اجيب تصريح السفر لازم اروح الكليه اجيب اثبات قيد تاااااااااااني من الكليه (هو نفس اثبات القيد اللي راح للجوازات ...بس الروتين بقى)
ولما روحت النهارده اجيب اثبات القيد النهارده من الكليه وقدمت الورق لموظف شئون الطلاب طلب مني اروح اسأل عليه بكره .... ولما قولتله اني مستعجل كان الرد بلهجه الموظف القرفان من نفسه دايما ما قولتلك تعالى بكره
وبالتالي هستنى لحد بكره عشان اجيب اثبات القيد وماعرفش الروتين هيخليني استنى تاني لحد امتى ...ومعرفش هتتأجل العمره للمره الرابعه ولا لا ....
وربنا يكفينا ويكفيكوا شر الروتين المصري
ويجعلو عااااامر
...


Thursday 7 June 2007

التاج وصل يا بشر


ربنا يقوينا ونقدر نجاوب (stop here ) وادي كمان التاج وصل واللي مررتهولي كليوباترا
يلا بينا نبدأ؟؟
يلا بينا..
من هو:أحب شخص لقلبك فى الدنيا؟
اكتر اكتر شخص بحبه
ابويا و امي
انما في ناس كتييييييير قريبين منهم كيمو ومحمد صلاح صحابي الانتيم واصحاب تانيين كتتير مش عاوز اقول اسمائهم عشان ما انساش حد
و مديري في الشركه اللي بتدرب فيها
وحد تاني ومش لازم اقول مين
انسان مستعد تضحي بحياتك - ركز فى كلمة حياتك- علشانة؟
ابويا او امي
او لو شخص هو اساسا كل حياتي نفسها
اسم أول حب؟
مش هقول :P
ان كان ولا بد يبقى امي
اسم اخر حب(حتى الان)؟
:Pيبقى هو نفسه اول حب
:D
ما هو :اسم أجمل كتاب كتبه بشر قرأته ومحتفظ به حتى الان ؟
حوار مع صديقي الملحد
للدكتور مصطفى محمود
بس للاسف انا مش محتفظ بالكتاب ده لانه مش عندي اصلا ده كتاب كنت اخدته من صاحبي اقراه وانا في 3 اعدادي ورجعتهوله
يعني شوفوا بقى من كام سنه ولسه بدور عليه في المكاتب لحد دلوقتي
ونداء لاصحاب القلوب الرحيمه
اللي يلاقي الكتاب ده في اي مكتبه يقولي على اسم المكتبه وانا اروح اجيبه
بس في كتابين تانيين دول بقى عندي
الانفجار 1967
اكتوبر 73
والاتنين دول لمحمد حسنين هيكل

اسم كتاب-كتبه بشر برضة- انت متعلق بيه وبتقرأه كل فترة؟
نفسي اجيب كتاب حوار مع صديقي الملحد :(

اهم جهاز منزلى انت متعلق بيه او بتستخدمه كتير ؟
الكمبيوتر طبعا
وبعده الريسيفر
شىء تحس بالراحة النفسية عندما تنظر اليه ؟
السماء
مكان تحس فيه بالحنين الى شىء لا تدرى ماهو و ذكريات جارفة الى لاشىء ؟
المنطقه اللي كنت ساكن فيها الاول
الهـــــــــرم
مكان تحس بالراحة عندما تدخله ؟
البيت
اجمل مدينة زرتها داخل مصر ؟
العريش والغردقه
وسمعت على اسكدنريه انها اجمل مدينه في مصر بس ماروحتهاش خالص
نفسي اروحها يا عااااااااااااااااااااااااالم
أجمل مكان طبيعي رأيته داخل مصر؟
هو في مكان جميل في مصر؟؟؟
ده مافيش مكان طبيعي في مصر ما ضيعوش جماله

نوع هاتفك المحمول؟
nokia 3250

سرعة بروسيسور جهازك ؟
والله يابني مانا فاكر
حجم ذاكره-هارد جهازك ؟
80
بعد ما كان
120
الله يرحم بقى :(
المساحة التى تشغلها المواد الاسلامية على جهازك ؟
تقريبا 1 جيجا
عشان الهارد لسه جديد وفاضي
نفس المساحة السالف ذكرها فى قلبك-الاجابة لنفسك عشان الرياء يا اخواننا ؟
Done
شخصيه كارتونيه بتحبها؟
توم وجيري
أهم هدف انت واضعه لحياتك دلوقتى ؟
اتخرج من الكليه الخنفه دي
مواصفات فتاة –أو فتى للبنات- الأحلام بالنسبة لك ؟
مش حاطط مواصفات محدده غير انها تكون روحها جميله وتكون بالنسبالي ملاك في صوره بشر
من هو قدوتك في الحياه؟؟؟
مديري في الشركه
بعد رسول الله صلى الله عليه وسلم طبعا
صف ما يأتى :شعورك لما بتسمع كلمة مصر؟
حب وعزه
شعورك لما بتسمع كلام عن اليهود ؟
حرقه دم
شعورك لما بتشوف ظابط شرطه؟
احنا هنلبببببببببببببببببخ
شعورك لما بتشوف الكناس العجوز فى الطريق ؟
بحس بالنعمه اللي انا فيها وبحمد ربنا
لون البطانية اللى بتتغطى بيها فى الشتاء ؟
اشمعنا؟؟؟؟
بني
لون الجورب-الشراب- المفضل لديك ؟
اشمعنا؟؟
اسود
احساسك اذا داست قدمك فى الطريق على مخلفات اخراج حيوان- *** ولا مؤاخذة-؟
ايه القرف ده؟؟؟؟؟؟؟؟
احساس يراودك فى اشارة مرور مغلقة بسبب مسئول كبير؟
زهق وملل وببقى عاوز انام
اخيرا خلصت
الحمد لله
احب امرر التاج ده ل مصطفى (حكايات زمان) و emaraty واقولهم
ربنا يكون في عونكوا